जुम्ला कारागारमा १५ जनामा कोरोना संक्रमण पुष्टि
२३ जेठ,जुम्ला । जिल्ला कारागारमा रहेका १५ जना कैदीबन्दीलाई कोरोना संक्रमण पुष्टि भएको छ ।
कारागारमा कैदीबन्दीमा ज्वरो आउने र खोकी लाग्ने भएपछि कर्णाली स्वास्थ्य विज्ञान प्रतिष्ठान शिक्षण अस्पताल जुम्लाले आरटी पीसीआर परीक्षण गरेको थियो ।
कारागार भित्रका दुई महिला र १ सय २१ पुरुष गरी १ सय २३ जनाको कोरोना परीक्षण गरिएको थियो ।
जसमा १५ जना पुरुषलाई कोरोना संक्रमण पुष्टि भएको जेलर गयाप्रसाद पाण्डेले जानकारी दिनु भयो ।
उहाले भन्नु भयो , ‘कारागारमा कोरोना लक्षणका बिरामी भेटिएपछि पीसीआर परीक्षणका लागि अस्पताललाई आग्रह गर्यौ सोहीअनुसार परीक्षण गर्दा १५ जनामा कोरोना पुष्टि भयो ।’ संक्रमति १५ जनामध्ये एक जना ७७ वर्षीय पुरुषको कर्णाली स्वास्थ्य विज्ञान प्रतिष्ठानको आइसोलेसन कक्षमा उपचार भइरहेको छ ।
अन्य संक्रमितलाई कारागारभित्रै छुट्टै आइसोलेट गरिएको कारागार कार्यालय जुम्लाले जनाएको छ । कारागारभित्रै आइसोलेट गरिएका कैदीबन्दीलाई भने संक्रमणका लक्षण नदेखिएको जनाएको छ ।
कारागारमा कोरोना संक्रमण देखिएपछि उच्च सतर्कता अपनाइएको कारागार शाखा जुम्लाले जनाएको छ ।
महिलाहरुलाई अलग गरेर आइसोलेसन वार्ड बनाएको छ ।
जिल्ला प्रहरी कार्यालय जुम्लाका प्रमुख डिएसपी दानबहादुर थापाले संक्रमितको अवस्था हेरेर अस्पताल लिने ल्याउने कार्य भइरहेको र संक्रमितको नियमित रेखदेख तथा औषधि उपचार भइरहेको जानकारी दिनु भयो ।
नागरिक श्रोत
