कर्णाली राजमार्ग अझै सुचारु भएन, यात्रुहरु अलपत्र

कालिकोट ।  कर्णाली राजमार्ग दुई दिनदेखि अवरुद्ध भएको छ । राजमार्ग अबरुद्ध भएपछि सवारी साधनहरू बीच बाटोमा रोकिएका छन् भने यात्रुहरू अलपत्र परेका छन् ।

शुक्रबारदेखि परेको अविरल वर्षाका कारण विभिन्न ठाँउमा पहिरो जाँदा अवरुद्ध राजमार्ग अझै सञ्चालनमा आउन सकेको छैन ।
राजमार्गको कालीकोट खण्डमा चार  ठाउँमा पहिरो गएको छ । पहिरो पन्छाउन बाँकी रहेकाले आइतबार बिहानसम्म पनि राजमार्ग सञ्चालन हुन नसकेको हो ।

कालीकोटको शुभकालिका गाउँपालिका–१, गगने खोला, दहीखोला,  एसमोड,तिलगुफा नगरपालिका –६, टिमुरे र हुल्ममा पहिरो जाँदा सडक अवरुद्ध भएको प्रदेश प्रहरी कार्यालयले जनाएको छ । अहिलेसम्म कर्णालीमा मानवीय क्षति नभएको प्रहरीले बताएको छ ।