लालु–लैफु शहिदमार्ग माल्कोट पुग्दै
कालिकोट । नेपाल कम्युनिष्ट पार्टीले निमार्ण कार्य सुरु गरेको लालु–लैफु शहिदमार्ग केही दिनमा माल्कोट पुग्दै छ ।
शुक्रवारबाट डोजर लगाएर रोकिएको निमार्ण कार्य सुरु भएकाले केहीदिनमा सहिदमार्ग माल्कोट पुग्ने नेपाल कम्युनिष्ट पार्टीले जनाएको छ । नेपाल कम्युनिष्ट पार्टीले २०७४ साल फागुन १ गते देखि सरकारको सहयोग विना आफ्नै बलले खुलालु देखि लालु हुदै माल्कोट रुप्सासम्मको सहिद मार्ग निमार्ण कार्य सुरु गरेको थियो ।
तर प्रतिबन्धका बेला सरकारी निकायहरुले नै सहिदमार्ग निमार्ण कार्यलाई अवरोध पुर्याएका थिए ।
अहिले यो मार्गलाई लैफुसम्म पुर्याउने नेकपाको तयारी छ । नेकपाले लालु–लैफु शहिदमार्ग निमार्ण कार्यका लागि सरकारी तहबाट केही बजेटसमेत हाल्न लगाएर पछिल्लो चरणमा सहिदमार्ग निमार्ण कार्यलाई तिव्रता दिएको छ ।
नेकपाका प्रवक्ता प्रकाण्डले रोकिएको कामलाई सुचारु गर्न बेला– बेला निर्देशन दिने गर्नुभएको छ । उहाँले सरकारी निकायलाई समेत बजेट व्यवस्था गर्न र छिटो बाटो निमार्ण गर्न पहल गरिरहनु भएको छ । माल्कोट गाउँ प्रवक्ताकै जन्मगाउँ हो ।
नेकपाको केन्द्रिय योजना अनुसार खुलालु देखि लैफुसम्मको सडकखण्ड निमार्ण हुने छ । अहिले भने माल्कोटसम्मको सडकखण्ड निर्माण गर्न लागिएको हो ।
पहिलो चरणमा लालु लैफु सडकको खुलालु माल्कोट सडकखण्ड अन्तरगत १२ किलोमिटर सडक निर्माण गर्ने कार्य केही दिनमा सकिने छ । यो सडक गाउँ –गाउँ हुदै माथिल्लो भागबाट लैफुसम्म पुग्ने छ ।
नेकपाले कालिकोटमा जनयुद्धको बेला धेरै क्रान्तिकारी योद्धाहरुको रगत बगेकाले र सहिद भएकाले लालु –लैफु सडक खण्डलाई सहिदमार्गको नाम दिएको छ ।
यद्यपि कर्णाली नदिको किनारमा नेपाली सेनाले काटेको सडकलाई भने कर्णाली करिडोर भन्ने गरिएको छ ।
२०७१ साल चैत्र ०९ गतेबाट निर्माण शुरु गरिएको उक्त सडक खण्ड कुल १२२.७५ कि.मि. लम्बाई र औसत ६ मिटर चौडाई रहेको छ । यो सडक खण्डले कालिकोट, बाजुरा र हुम्ला जिल्लालाई जोडेको छ ।
