सुदूरपश्चिम सरकारलाई कांग्रेसको १५ नम्बर

ज्वाला खबर

प्रकाशित मिति : ५ फाल्गुन २०७६, सोमबार

फाल्गुन ५, कैलाली । प्रदेशसभा बैठकमा आएका प्रमुख प्रतिपक्षी दल नेपाली काँग्रेसका सांसद कर्ण मल्ललाई केही पत्रकारले सरकारको दुई वर्षको समीक्षा गर्न आग्रह गरे । खरो स्वाभावका सांसद मल्लले सरकार निर्लज्ज भएको टिप्पणी गर्नु भयाे ।

‘सरकार निर्लज्ज अवस्थामा छ । यसलाई सरकार भन्न मिल्दैन’ उहाँले भन्नु भयाे ‘यसको ढंग पनि छैन । जवाफदेहीता पनि छैन । पारदर्शी पनि छैन ।’

‘सरकारले एक सय पूर्णाङ्कमा कति नम्बर ल्याउला त’ पत्रकारको प्रश्न ।

‘उल्टोबाट सय नम्बर छ’ सरकारप्रति गुनासो पोख्दै उहाँले भन्नु भयाे, ‘अनुशासनहीन र अकर्मण्यताको सरकार हो यो । कानुन ३२ वटा बनेको छ । तर, ३२ अक्षर पनि पालना भएको छैन । बजेट अपारदर्शी छ । भ्रष्टाचार चरमचुलीमा छ ।

प्रतिपक्षी दलका सांसदहरूले सरकारले दुई वर्षमा केही गर्न नसकेको आरोप लगाइरहँदा प्रदेश सरकारले पनि दुई वर्षका उपलब्धी सार्वजनिक गर्न सकेको छैन ।

प्रदेश सरकारले घोषणा गरेको सुपथ मूल्य पसल, प्रदेश क्रिकेट मैदान, सबै स्थानीय तहमा हाट बजार, प्रदेश खाद्य डिपो, औद्योगिक ग्राम, जडीबुटी प्रशोधन केन्द्र स्थापनालगायतका योजना पनि सुरु हुन सकेको छैन ।

सोमबार प्रदेश सरकारको दुई वर्ष पुरा हुँदा प्रतिपक्षी दलका सांसद मात्रै होइन सत्तारुढ दलका सांसद पनि सन्तुष्ट देखिएनन् ।

सत्तारुढ दल नेपाल कम्युनिस्ट पार्टी नेकपाका सांसद अमर साउदले अपेक्षा अनुसारको उपलब्धि आउन नसकेको बताउनु भयाे । उहाँले सरकारको कामको मूल्याङ्कन गर्दै ५० नम्बर दिन सकिने बताउनु भयाे । ‘जति सन्तोष हुनुपर्ने थियो त्यति सन्तुष्ट छैन’ उहाँले भन्नु भयाे ‘मेरो तर्फबाट सरकारलाई ५० नम्बर हो । त्यो भन्दा बढी नम्बर दिन सक्ने अवस्था छैन ।’

सुदूरपश्चिम सरकारले प्रदेशका ९ वटै जिल्लामा प्रदेश गौरवका सडक बनाउने लक्ष्य राखेको थियो । त्यो सँगै प्रदेश बस सेवा सञ्चालन गर्ने योजना पनि छ । तर अहिलेसम्म दुवै अलपत्र छ । नेकपाकी सांसद पूर्णा जोशीले सरकारको काम निकै सुस्त भएको प्रतिक्रिया दिउनु भयाे ।

‘सरकारको आफ्नो योजना छैन । त्यसैले नम्बर दिने अवस्था पनि छैन’ उहाँले भन्नु भयाे ।

सामाजिक विकास मन्त्रीबाट बर्खास्तीमा परेका नेकपा सांसद दीर्घ सोडारीले सरकारले पासमार्क ल्याएको बताउनु भयाे ।

‘सरकार सुस्त गतिमा छ । अब द्रुत गतिमा जनतको अपेक्षा पुरा गर्नुपर्छ’ उहाँ भन्नुहुन्छ, ‘सरकारले पास मार्क ल्याएको छ । ५० प्लस छ । माइनस छैन ।’

नेकपाका सांसद कुलवीर चौधरीले कर्मचारी समायोजनको कारणले सरकारले काम गर्न नसकेको जनाउनु भयाे । उहाँले दुई वर्षको कामको आधारमा सरकारलाई ५० नम्बर दिन सक्ने बताउनु भयाे । ‘नगरेको होइन । गर्दागर्दै पनि नभएको हो । कर्मचारी समायोजनले समस्या गर्‍यो’ उहाँले भन्नु भयाे ।

नेकपाका सांसद लालबहादुर खड्काको नजरमा सरकारको काम प्रथम श्रेणी सरहको छ । उहाँले भन्नु भयाे, ‘सरकारले व्यवस्थापनको काम गरिरहेको छ । देखिने काम मात्रै नभएको हो । प्रदेश सरकार प्रथम श्रेणीमा छ ।’

सरकारले बिजनेस दिन नसक्दा पाँच महिना स्थगित भएको प्रदेशसभाको हिउँदे अधिवेशन माघ ६ गते सुरु भएको छ । प्रदेशसभाले बनाएको कानुन पनि कार्यान्वयन नभएको सत्तारुढ दलकै सांसदहरूको भनाइ छ ।

नेकपाका सांसद लिलाधर भट्ट सरकार आफ्नै गतिमा चलिरहेको बताउनु हुन्छ । ‘तुलनात्मक रूपमा ठीकै छ । जति सोचेका थियौं त्यो भएन । तर, पनि सन्तुष्ट हुनुपर्छ’ उहाँले भन्नु भयाे, ‘यो उत्साहजनक पनि होइन । निराशाजनक पनि छैन । सरकारलाई ५० देखि ६० सम्म नम्बर दिन सकिन्छ ।’

सत्तारुढ दलका अधिकांश सांसदहरूले सरकारलाई पास नम्बर दिए पनि प्रतिपक्षी दलका सांसदहरू सरकार फेल भएको बताएका छन् ।

प्रमुख प्रतिपक्षी दल नेपाली काँग्रेस संसदीय दलका नेता डा. रणबहादुर रावलले सरकारले बजेट खर्च गर्न नसकेको भन्दै सरकारलाई १५ नम्बर पनि दिन नसकिने बताउनु हुन्छ ।

‘सयमा पन्ध्र पनि दिन सकिँदैन’ उहाँ भन्नु हुन्छ, ‘फेल भयो सरकार । कुनै पनि योजना कार्यान्वयन गर्न सकेन । ७ महिना बितिसक्दा पनि अख्तियारी दिएको छैन । भ्रष्टाचार बढेको छ । शान्ति सुरक्षाको अवस्था चिन्ताजनक छ । महँगी पनि घटेन ।’

राष्ट्रिय जनता पार्टी राजपाको मूल्याङ्कनमा पनि सरकार पास भएको छैन । राजपाकी सांसद मालामति देवी रानाले भन्नु भयाे, ‘सरकारको काम प्रति हामी सन्तुष्ट छैनौँ । शतप्रतिशत नम्बर दिने पक्षमा थियौं । तर, काम हेर्दा १५ देखि २० नम्बर मात्रै दिन सक्छौं ।’

प्रदेश सरकारका प्रवक्तासमेत रहेका आन्तरिक मामिला तथा कानुनमन्त्री प्रकाश शाहले कर्मचारी, संयन्त्र, संरचना र अधिकार प्राप्ति ढिलाइ हुँदा केही समस्या भइरहेको बताउनु भयाे ।

‘हातखुट्टा बाँधेर पोखरीमा छोड्दिएपछि तपाई परिणाम निकाल्न सक्नुहुन्छ ?’ उहाँले भन्नु भयाे, ‘हाम्रो अवस्था पनि त्यस्तै छ ।’