प्रधानमन्त्रीलाई कांग्रेसको अपील ः डा. केसीको जीवन रक्षा गर

७ असोज, काठमाडौं । प्रमुख विपक्षी नेपाली कांग्रेसले डा. गोविन्द केसीको जीवन रक्षा गर्न प्रधानमन्त्रीलाई अपील गरेको छ ।
कांग्रेस प्रवक्ता विश्वप्रकाश शर्माले विज्ञप्ति जारी गर्दै वार्ता टोली गठन गरेर डा. केसीसँग इमान्दार वार्ता र सार्थक कार्यान्वयनको तदारुकताका साथ प्रस्तुत हुन प्रधानमन्त्री केपी शर्मा ओलीलाई आग्रह गर्नु भएको हो । जुम्लामा पुगेर २९ भदौमा अनसन बस्नु भएका डा. केसी अहिले त्रिवि शिक्षण अस्पतालमा हुनुहुन्छ ।
प्रधानमन्त्रीको अग्रसरता ०७५ साउन १० गते सरकारले गरेको सम्झौता उल्लंघन नभएको भए अहिलेको परिस्थिति नआउने कांग्रेसले बताएको छ । कांग्रेसले भनेको छ, ‘डा. केसीको यो अनशनको समयमा ‘बिराएको बाटोबाट ठिक बाटोमा आउन’ संघीय सरकारलाई नेपाली कांग्रेस हार्दिक अपील गर्दछ ।’
साथै कांग्रेसले काठमाडौं पुगेपछि जबरजस्ती ट्रमा सेन्टरमा लैजानुले सरकारको अविवेकी र अनुदार चरित्र थप उजागर भएको बताएको छ ।