२० चैत, काठमाडौं । लिग लिडर बार्सिलोना स्पेनिस ला लिगा फुटबलमा भिल्लारियलसँग बराबरीमा रोकिएको छ ।
मंगलबार राति भएको खेलमा बार्सिलोना भिल्लारियलसँग ४-४ गोलको बराबरीमा रोकिएको हो । बार्सिलोनाका लागि कप्तान लियोनल मेस्सी, लुइस स्वारेज, फिलिप कौन्टिन्हो र माल्कोमले गोल गरे । भिल्लारियलका लागि स्यामुयल चुकवाजाई, कार्ल टोको इकाम्बी, भिसेन्ट इबोरा र कार्लोस बाकाले गोल गरे ।
बार्सिलोनाका लागि कौटिन्होले १२ औं मिनेटमा गोल गर्दै बार्सिलोनालाई अग्रता दिलाएका थिए । त्यस्तै, खेलको १६ औं मिनेटमा माल्कोमले गोल गर्दै बार्सिलोनालाई २-० को अग्रता दिलाए ।
तर स्यामुयलले २३ औं मिनेटमा भिल्लारियललाई २-१ गोलको स्थितिमा ल्याएका थिए । पहिलो हाफमा २-१ गोलअन्तरले पछि परेको भिल्लारियलले दोस्रो हाफमा उत्कृष्ट प्रदर्शन गर्दै तीन गोल गर्दा बार्सिलोनाले दुई गोल फर्काउन सफल भयो ।
बार्सिलोनाविरुद्ध खेलको ५० औं मिनेटमा इकाम्बीले गोल गर्दै भिल्लारियललाई बराबरीमा ल्याएका थिए । खेलको ६२ औं मिनेटमा इबोराले गोल गरेसँगै भिल्लारियलले ३-२ गोलको अग्रता बनायो ।
उत्कृष्ट पुनरागमन गरेको भिल्लारियलले खेलको ८० औं मिनेटमा गोल गर्दै जित नजिक पुगेको थियो । यो पटक बाकाले गोल गर्दै भिल्लारियललाई ४-२ को अग्रता दिलाएका थिए ।
तर खेलको अन्तिम समयमा भने बार्सिलोनाले सनसनीपूर्ण प्रदर्शन गर्यो । खेलको ९०औं मिनेटमा कप्तान मेस्सीले गोल गर्दै बार्सिलोनालाई ४-३ गोलको स्थितिमा ल्याए । त्यसपछि अतिरिक्त समयमा स्वारेजले गोल गर्दै बार्सिलोनालाई ४-४ बराबरीमा ल्याउँदै हारबाट जोगाए ।
त्यस्तै, गएराति नै भएको खेलमा एट्लेटिको मडि्रडले गिरोनालाई २-० गोलअन्तरले पराजित गर्दा स्पानियोल र गेटाफे भने १-१ गोलको बराबरीमा रोकिएका छन् ।
१
२
३
४
५
प्रतिक्रिया दिनुहोस