भाद्र ४ कालिकोट । कर्णाली प्रदेशमा आज प्रदेश स्थापना तथा शहीद दिवस मनाइएको छ ।
यस अवसरमा प्रदेश सरकारले आज सार्वजनिक बिदा पनि दिएको छ । आन्तरिक मामिला तथा कानून मन्त्रालयका प्रवक्ता तुलबहादुर खड्काले प्रदेश मन्त्रिपरिषद् बैठकले हरेक वर्ष भदौ ४ गतेलाई प्रदेश स्थापना तथा शहीद दिवसका रुपमा मनाउने निर्णय गरेको बताउनु भएको छ ।
विसं २०७२ साउन–भदौमा सञ्चालित प्रदेश प्राप्तिको आन्दोलनमा सहभागी सुर्खेतका यामबहादुर बिसी, टीकाराम गौतम , गोपालसिंह रजवार र जुम्लाका हरिबहादुर कुँवरले उच्च शहादत प्राप्त गर्नु भएको थियो । तत्कालीन सरकारले मृतकलाई शहीद घोषणा गर्नुका साथै अलग प्रदेश स्थापनाको माग पुरा गरेपछि आन्दोलन स्थगन भएको थियो।
कर्णाली सरकारले यही दिनको सम्झना स्वरुप प्रदेश स्थापना दिवस मनाउने निर्णय गरेको हो । नयाँ संविधानको मस्यौदा निर्माण अन्तिम चरणमा पुगेका बेला प्रमुख दलका नेताहरु सम्मिलित विशेष समितिले २०७२ साउन २३ मा ६ प्रदेशको खाका सार्वजनिक गरेपछि भेरी–कर्णाली क्षेत्र असहमति जनाउँदै आन्दोलित भएको थियो ।
त्यतिबेला सुदूरका नौ तथा मध्यपश्चिमका १० जिल्ला (रुकुम आधा) समेटेर एउटै प्रदेश प्रस्ताव गरिएको थियो । बेग्लै र स्वायत्त प्रदेशको माग राखी १३ दिनसम्म चलेको आन्दोलनका क्रममा प्रहरीको गोली लागेर सुर्खेतमा तीन र जुम्लामा एक जनाले वलिदान भएको भने थुप्रै सर्वसाधारण घाइते भएको थिए ।
भेरी–कर्णाली क्षेत्रमा आन्दोलन उत्कर्षमा पुग्न थालेपछि भदौ ४ गते प्रमुख राजनीतिक दल प्रस्तावित ६ प्रदेशको सीमाङ्कन पुनरवलोकन गर्न बाध्य भए ।
अन्ततः सात प्रदेश सहितको सङ्घीय संरचना निर्माण गर्ने समझदारी अनुरुप साविक कर्णालीका हुम्ला, मुगु, डोल्पा, जुम्ला र कालीकोट, भेरीका दैलेख, सुर्खेत र जाजरकोट, राप्तीका सल्यान र रुकुम (पश्चिम भाग) समेटेर ६ नम्बर प्रदेश घोषणा भयो ।
१
२
३
४
५
प्रतिक्रिया दिनुहोस