दोहोरो भिडन्त
दोहोरो भिडन्तमा
किन कहिल्यै पनि मर्दैन सरकार
सँधैं किन नागरिकहरू मात्र मर्छन बा ?
एका बिहानै छोरीले सोधिन्
म के उत्तर दिने भनेर विचलित छु ।
दोहोरो भिडन्त
उहिल्यै पनि भयो सुखानीमा
त्यहाँ पनि सरकार मरेन
मात्र नागरिकहरू मरे !
छिन्ताङ र पिस्करमा पनि
भएका थिए दोहोरो भिडन्त
त्यहाँ पनि सरकारको भुत्लो झरेन !
दोरम्बा र भिमादमा
माझफाल र अनेकोटमा
धेरै ठाउँमा भए दोहोरो भिडन्त
हताहती एकोहोरो मात्र भयो ।
भर्खरै हिजो अस्ति
फेरि भयो अर्को दोहोरो भिडन्त
त्यहाँ पनि एकोहोरै मृत्यु भयो
सरकारको कोही मरेन !
सरकारले रचेका
दोहोरो भिडन्तका कथामा
सरकार नै नायक हुन्छ
यस्तो नायक कि,
एक थप्पड पनि नखाई उसले
खलनायकहरूलाई सोत्तर पार्छ ।
मरिसकेका चिसा हातमा
थमाएर एक थान कटुवा पेस्तोल
सरकारले अन्तिम दृश्य खिच्छ
र प्रसारण हुन्छ
त्यही अन्तिम दृष्य मात्र ।
त्यसपछि
रेडियो, टेलिभिजन
पत्रपत्रिका र अनलाइनहरूमा
सरकारी भर्त्सनाको प्रचार हुन्छ
फलानो ठाउँमा
सुरक्षा फौजसँगको दोहोरो भिडन्तमा
यति आतङ्ककारी ठहरै !
म मनमनै यही सोचिरहेको हुन्छु
छोरी फेरि सोध्छिन्,
भन्नुस न बाबा ?
भिडन्त चाहिँ दोहोरो हुने
मान्छे चाहिँ एकोहोरो मर्ने
यस्तो कसरी हुन्छ ?
मेरो एकाग्रता भत्किन्छ
झल्याँस्स हुन्छु
छोरी मतिर हेरिरहेकि छिन्
पढ्ने बेलामा गुच्चा खेलेर
परीक्षामा कलम टोकेर बस्ने
आवारा विद्यार्थीझैं
म केवल टोलाइरहन्छु ।
मेरो बाबा त नट्टी
यति सोधेको पनि बोल्नु हुन्न ?
छोरी रिसाउँछिन्
म छोरीलाई सम्झाउँछु
त्यो दोहोरो भिडन्त थिएन छोरी
त्यो भिडन्त पनि थिएन
त्यो त मान्छेलाई समाएर
मार्ने काम हो छोरी ।
त्यसो भए
सरकार नट्टी हो त बाबा ?
छोरीको प्रश्न ।
हो, मेरी ज्ञानी छोरी हो
दोहोरो भिडन्त
सरकारको नट्टी खेल हो
मेरो जवाफ ।
